ЕҰУ Түркияның бес жұлдызды қонақүйлерінде өндірістік тәжірибеден өту мүмкіндіктерін кеңейтуде

Л.Н. Гумилев атындағы Еуразия ұлттық университетінің «Туризм» кафедрасының меңгерушісі Ляйля Муталиева «Түркияның люкс санатындағы бес жұлдызды қонақүйлерінде тәжірибеден өту» бағдарламасы аясында Анталья қаласына (Түркия) ұйымдастырылған танысу сапарына қатысты.

Сапарға түрлі жоғары оқу орындарының өкілдері: ректорлар, проректорлар, директорлар, декандар, кафедра меңгерушілері және құрылымдық бөлімшелердің басшылары қатысты. Негізгі назар өндірістік тәжірибені ұйымдастыру және халықаралық жұмыс берушілермен ынтымақтастықты дамыту мәселелеріне аударылды.

ЕҰУ өкілінің сапарға қатысу мақсаты - университет білім алушылары мен түлектерінің Түркияның жетекші бес жұлдызды қонақүйлерінде өндірістік тәжірибеден өту жағдайларымен танысу, сондай-ақ туризм және қонақжайлылық саласындағы халықаралық әріптестікті кеңейту мүмкіндіктерін зерделеу.

Сапар барысында қатысушылар жұмыс берушілердің болашақ мамандардың кәсіби құзыреттеріне қоятын талаптарымен, тәжірибені ұйымдастыру шарттарымен және практикалық дағдыларды дамыту мүмкіндіктерімен танысты. Білім алушылардың қонақүй-мейрамхана индустриясы мен туризм саласында сұранысқа ие қосымша микробіліктіліктерді игеру перспективаларына ерекше назар аударылды.

Бағдарлама аясында Ляйля Муталиева ЕҰУ  ректоры Е. Сыдықов қол қойған меморандумды да таныстырды.

Сапарға қатысу тәжірибеге бағдарланған білім беруді нығайту және университет пен «Туризм» кафедрасының халықаралық жұмыс берушілермен ұзақ мерзімді ынтымақтастығын дамыту жолындағы маңызды қадам болды. Өндірістік тәжірибе базасын кеңейту білім алушылардың кәсіби өсуіне және туризм мен қонақжайлылық саласындағы мамандарды даярлауды жетілдіруге қосымша мүмкіндіктер береді.